A mesme

A mesme. Façon de parler adv. qui n'a d'usage qu'avec les verbes, Estre, mettre & laisser.

On dit, Estre à mesme, En parlant d'une personne qui aime extremement quelque chose, & qui se trouve en estat de se satisfaire pleinement là-dessus. Vous aimez les figues, en voilà, vous estes à mesme, vous voilà à mesme, mangez-en tant que vous voudrez. On dit, Mettre à mesme, laisser à mesme, A peu prés dans le mesme sens. Il aime les livres, je l'ay mené dans un cabinet où il y en a quantité de bons, & je l'ay mis à mesme, je l'ay laissé à mesme.

A mesme, Se dit aussi quelquefois avec un Regime, & alors il est préposition. Je l'ay mis à mesme les livres.

De mesme, tout de mesme. Façons de parler comparatives qui signifient de la mesme sorte. Si vous en usez bien, il en usera de mesme, tout de mesme. faites de mesme, il est sans consequence, il n'en est pas de mesme de vous, pour vous il n'en est pas de mesme. il est de mesme de cela que de toutes les autres choses. j'ay creu de mesme que vous que.... j'ay un livre tout de mesme que le vostre. ma chambre est tournée de mesme, tout de mesme que la vostre. elles sont faites tout de mesme l'une & l'autre, tout de mesme l'une que l'autre. il fondit sur luy de mesme que l'oiseau fait sur la perdrix.

Lors qu'on fait deux membres d'une comparaison, & qu'on met De mesme que au commencement du premier, on met aussi ordinairement de mesme, au commencement du second. De mesme qu'une cire molle reçoit aisément toutes sortes d'empreintes, & de figures; de mesme un jeune homme reçoit facilement toutes les impressions qu'on veut luy donner. de mesme que les aigles &c. de mesme les esprits bien nez &c.