Feint, [f]einte

Feint, [f]einte. part. Il a les significations de son verbe actif. Un mal feint. une amitié feinte. une histoire feinte.

Il est aussi Adjectif, & signifie Qui dit, qui tesmoigne le contraire de ce qu'il pense, & se joint presque tousjours avec dissimulé. C'est un esprit feint & dissimulé.

Feinte. s. f. Dissimulation, Deguisement, Artifice par lequel on cache une chose, sous une apparence contraire. Il fait semblant d'estre de vos amis, mais ce n'est que feinte. toute sa devotion n'est que feinte. il m'a surpris par ses feintes. ses feintes n'ont pas réussi.

Feinte se dit en matiere d'Escrime, Quand on fait semblant de vouloir porter le coup en un endroit du corps, & qu'on le porte en un autre. Faire une feinte. il fit une feinte & passa sur luy.