Roy

Roy. s. m. Monarque. Prince souverain, couronné. Grand Roy. puissant Roy. Roy hereditaire. Roy electif. Roy legitime. les anciens Rois. les Rois d'Assyrie. les Rois d'Israël. les Rois de Juda. les Rois chrestiens. le Roy de France. le Roy tres-chrestien. le Roy des Romains, le Roy d'Espagne, le Roy Catholique. les Rois du Nord. la puissance des Rois. la majesté des Rois. la Cour d'un Roy. en foy & parole de Roy. proclamer un Roy. couronner, sacrer un Roy. élire un Roy. alliance de couronne à couronne, de Roy à Roy. Dieu est le maistre des Rois. les Rois ne reconnoissent que Dieu au dessus d'eux. Dieu tient le coeur des Rois dans sa main. il est le protecteur des Rois. Dieu est appellé dans l'Ecriture le Roy des Rois, le Roy du Ciel.

On dit prov. & fig. que Les Rois ont les mains longues, pour dire, que Leur pouvoir s'estend bien loin, & qu'en quelque lieu que l'on soit il est dangereux de les offenser.

On dit aussi prov. d'Un homme magnifique, qu'Il vit en Roy, qu'il fait une depense de Roy. d'Un homme genereux & liberal, qu'Il a un coeur de Roy. d'Un homme extremement heureux dans son estat, qu'Il est heureux comme un Roy, comme un petit Roy. d'Un homme imperieux & hautain qu'Il parle en Roy, qu'il fait le Roy. & d'Un homme qui aime à faire plaisir, & qui est d'un agreable commerce, que C'est le Roy des hommes.

On dit encore prov. d'Un manger exquis & delicieux, que C'est un manger de Roy, & d'un grand plaisir, que C'est un plaisir de Roy.

On dit prov. d'Un Roy foible & qui ne sçait pas user de son pouvoir, ou d'un Roy dont le pouvoir est fort limité, fort borné, que C'est un Roy en peinture, un Roy de cartes. & prov. & dans le stile familier, en parlant d'une maison, d'une compagnie où la subordination n'est point gardée, on dit, C'est la cour du Roy Petaut, chacun y est maistre.

On dit par exaggeration qu'Un homme est noble comme le Roy, pour dire, qu'Il est d'une ancienne noblesse & tres-bien reconnuë: & lors qu'un homme riche & puissant a quelque chose de rate, de curieux, on dit prov. pour marquer, qu'Il n'y a pas lieu d'en estre surpris. Qui aura de beaux chevaux, si ce n'est le Roy?

On dit, Estre sur le pavé du Roy, pour dire, Estre dans la ruë, ou dans un chemin dont personne n'a droit de chasser celuy qui y est. Et on dit, Aller ou le Roy va à pied, où le Roy n'envoye personne, pour dire, Aller aux besoins naturels. On appelle en plaisanterie, la prison, La maison du Roy.

On dit, d'Une chose excellente à manger, qu'Elle ne pourroit pas estre meilleure quand ce seroit pour la bouche du Roy.

On appelle, Pied de Roy, Certaine mesure contenant douze poulces en longueur.

Quand on dit absolument Le Roy, on entend ordinairement le Roy dont on est né sujet, & c'est dans ce sens qu'on dit en France. Les ordres du Roy, les commandemens du Roy. l'authorité du Roy. la volonté du Roy. sous le bon plaisir du Roy. le service du Roy. les droits du Roy. le lever du Roy. le coucher du Roy. obtenir des provisions du Roy. un benefice à la nomination du Roy. le Roy seant en son Conseil. agir, parler au nom du Roy. une terre qui est dans les plaisirs du Roy. Voy PLAISIRS. Les gens du Roy. Voy GENS.